Владата го предложи судијата Ненад Савески за нов државен јавен обвинител. Тој беше еден од четворицата кандидати за кои Советот на јавни обвинители во февруари годинава даде позитивно мислење.
Портпаролката на Владата, Марија Митева, на прес-конференција по владината седница изјави дека одлуката Савески да биде предложен за шеф на републичкото јавно обвинителство е донесена по конструктивна дискусија во која биле разгледани сите аспекти на кандидатите – од професионално искуство до личен интегритет.
Таа посочи дека Владата оценила оти Савески е кандидат кој може да придонесе за нов пристап во работата на Јавното обвинителство и за зајакнување на институцијата.
Митева нагласи дека предлогот се темели на стручните оценки и мислењата доставени од Советот на јавни обвинители, како и на анализа на професионалниот интегритет, искуството и резултатите на кандидатот. Според Владата, предложениот кандидат ги исполнува потребните критериуми за функцијата.
Во својата изјава таа истакна дека Владата се водела од принципите на професионалност, интегритет и посветеност на владеењето на правото, додавајќи дека се очекува новиот обвинител да придонесе за зајакнување на институционалниот капацитет, подобрување на професионалните стандарди и зголемување на довербата на јавноста.
Ненад Савески во моментов е судија во Основниот кривичен суд Скопје, во одделот за организиран криминал и корупција. Тој е магистер по правни науки од Правниот факултет „Јустинијан Први“ при УКИМ и има положен правосуден испит. Во својата кариера бил и обвинител во Основното јавно обвинителство.
Савески има и повеќе меѓународни ангажмани, меѓу кои како експерт во ОБСЕ во Македонија и учество во проекти на Советот на Европа и УСАИД. Учествувал во работни групи за судски и законски реформи, како и во проекти поврзани со посебни истражни мерки, притвор и кривична постапка.
Покрај судската работа, Савески е предавач во Академијата за судии и јавни обвинители и обучувач во програмата HELP на Советот на Европа, а има и објавено повеќе научни трудови.
Покрај него, позитивно мислење од Советот на јавни обвинители добија и обвинителките Анита Тополова‑Исајловска, Ленче Ристоска и Лидија Раичевиќ.
Иако формално беше меѓу кандидатите, премиерот Христијан Мицкоски во интервју пред неколку недели изјави дека Ристоска не е во игра за позицијата шеф на републичкото обвинителство.
