Фудбалерите на Струга ТЛ покажаа карактер и со пресврт стигнаа до голема победа на гостувањето кај Брегалница во Штип. Лидерот на табелата по негатива на полувремето успеа во вториот дел да ја преземе контролата, да постигне два гола и да ги однесе трите бода дома.
Првиот дел им припадна на домашните фудбалери, кои иако не создадоа голем број шанси, успеаја да ја искористат најдобрата можност. Претходно Струга ТЛ ја погоди стативата од голот на Јашар, но Брегалница прва стигна до водство.
Во 42. минута Велков нафрли од левата страна, а Иван Глигоров со одлична реакција од прва го совлада Василев, погодувајќи во долниот десен агол за 1-0. Со предност на штипјани се замина на пауза.
Во второто полувреме ситуацијата на теренот целосно се промени. Струга ТЛ заигра поофанзивно, го притисна противникот и почна да создава прилики.
Израмнувањето пристигна во 51. минута и тоа на атрактивен начин. Арби Воша изведе корнер директно кон голот, а домашната одбрана не успеа да реагира, па топката заврши во мрежата за 1-1.
Само неколку минути подоцна гостите можеа и целосно да го свртат резултатот. Радески ја искористи несигурноста во одбраната на Брегалница, но неговиот удар заврши за малку покрај левата статива.
Брегалница се обиде да возврати, а во 74. минута Иван Глигоров беше во одлична позиција, но во последен момент неговиот удар беше блокиран.
Струга ТЛ продолжи да притиска, а во 81. минута Бојку упати опасен удар, но Јашар со одлична интервенција ја спаси својата мрежа.
Сепак, гостите дојдоа до целосен пресврт во 87. минута. По нафрлување од левата страна, Радески со удар со глава го совлада Јашар и донесе голема победа за Струга ТЛ.
Со овој триумф стружани продолжуваат во борбата за врвот на табелата, додека Брегалница останува без бодови од овој тежок натпревар.
