Минималната плата е ниска. За ова алармираат и работниците и синдикатот. Се најавува и генерален штрајк на Сојузот на синдикатите за следната среда. Се бара минималната плата да се зголеми на 600 евра.
Повторно се отвори дилемата дали улицата е место каде што треба да се решава овој проблем. Логично е и прашањето дали зградата на Владата е соодветно место каде треба да се свртени очите на работниците и синдикалците.
Премиерот Христијан Мицкоски јасно кажа дека државата нема намера административно да ја диктира висината на платите, туку дека решението треба да произлезе од договор меѓу работодавачите и работниците.
Па прашањето е каде се Стопанските комори, оти токму тие се најповикани да кажат за можностите за раст на платите. Ако Синдикатот започне штрајк, а Владата јасно кажува дека нема намера да биде арбитер, тогаш пасивноста на Стопанските комори и немањето нивен искрен дијалог со Синдикатите е голем проблем.
Прашањето за платите не е само социјално, туку и економско и мора да има издржлива основа. Затоа на потег се Стопанските комори и синдикатите да седнат и искрено да разговараат. Плата не би требало се добива на улица.
