На 3 декември, Собранието со 84 гласа „за“ го изгласа формирањето на Анкетна комисија која ќе ги испитува околностите и постапувањето на институциите во низа трагедии и несреќи во земјата. Комисијата ќе ги опфати настаните во Кочани, пожарот во Модуларната болница во Тетово, несреќата со автобусот на „Беса Транс“ и сообраќајката кај Ласкарци. Иницијативата беше поднесена од пратениците на ВМРО-ДПМНЕ, ЗНАМ и ВРЕДИ.
Одделната иницијатива за Анкетна комисија посветена исклучиво на трагичниот настан во Кочани, предложена од СДСМ, Левица и ДУИ, не беше прифатена и доби поддршка од само 28 пратеници.
Пратеникот Антонијо Милошоски од ВМРО-ДПМНЕ истакна дека целта на новата Комисија е да ги утврди сите пропусти што довеле до трагедиите, во кои животите ги загубија вкупно 138 луѓе. Тој додаде дека во сите случаи се забележуваат институционални слабости и нефункционалност на системот, а наодите ќе бидат проследени до Владата и Јавното обвинителство за евентуално утврдување политичка и кривична одговорност. Милошоски повика на неселективен пристап и охрабри сите пратеници, вклучително и претставници на СДСМ, да ја поддржат работата на Комисијата.
Од друга страна, Оливер Спасовски од СДСМ ја образложи потребата од формирање посебна Анкетна комисија за пожарот во дискотеката „Пулс“ во Кочани, нагласувајќи дека ваквото барање доаѓа од родителите на загинатите и од јавноста.
На истата седница, пратениците усвоија оглас за избор на претседател, потпретседател и членови на ДИК, како и низа законски измени, меѓу кои закони за правата на заедниците под 20%, за аудиовизуелни услуги, за ДДВ и за претворање на јавни давачки во траен влог во ЈП за спортски објекти. Усвоена беше и Среднорочната програма за стоковни резерви за периодот 2026–2030 година.
