Со блокада на зградата на Собранието, утре Сојузот на Синдикатите ќе се обиде да ги натера пратениците на соочување за да може директно да им ги соопштат своите барања. Претседателот на ССМ Слободан Трендафилов, вели дека оваа блокадата е дел од притисокот за зголемување на минималната
плата на најмалку 600 евра, како и линеарно покачување на останатите примања барем за 100 евра.
„Преку блокадата ќе ги оневозможиме тој ден да наплатат патни трошоци кои надминуваат и 100 евра за еден ден, да дојдат пешки или со градски превоз онака како што одат на работа работниците”, вели Трендафилов.
Претседателот на Собранието Африм Гаши пак, ги повика пратениците задолжително да дојдат на своите работни места и на седница, без да биде попречено правото на протест на работниците. Што се однесува до
потенцијално блокирање и на влезните врати од Парламентот и како тогаш ќе се реагира, Гаши упати на тоа дека тоа е прашање и работа на МВР.
За следната недела ССМ најави блокада и на Владата.
