Претседателот на Сојузот на синдикати на Македонија, Слободан Трендафилов, преку отворено писмо до јавноста порача дека најавениот протест на 28 јануари не е прашање на комфор или слободно време, туку прашање на егзистенција.
Тој нагласува дека ова не е протест на кој се доаѓа „ако се има време“, ниту настан што може да се одложи со изговори за студ, темнина или лоши временски услови. Според него, протестот е директно поврзан со платите на работниците, кои одамна не се доволни за нормален живот од месец до месец.
Трендафилов посочува дека никој нема да се избори за повисоки плати доколку работниците самите не застанат зад своите права, а потоа и заеднички, преку масовен отпор. Како што наведува, протестот е одговор на долгогодишното потценување и понижување на работниците, и од страна на работодавачите и од страна на власта.
Во писмото тој истакнува дека ниските плати за едни значат акумулација на капитал, а за други средство за политичка контрола, бидејќи сиромашниот народ, според него, е полесно управлив. Додава дека граѓаните со пристојни плати и сигурна работа не би зависеле ниту од газдите, ниту од политичките елити.
Протестот, како што нагласува Трендафилов, е и борба за иднината на младите, бидејќи со мизерните плати државата ги турка младите да ја напуштаат земјата. Тој ја оцени ситуацијата како длабоко неправедна, посочувајќи дека функционерите и носителите на власт добиваат значителни зголемувања на платите, додека работниците остануваат со минимални приходи. Како пример го наведе растот на платите на избраните и именуваните лица, кои, според него, си обезбедуваат стотици евра повеќе месечно, додека граѓаните кои ги финансираат преку буџетот остануваат без вистинска грижа.
Трендафилов упати јасен апел до работниците и граѓаните да не се плашат и масовно да им се придружат на синдикатите на 28 јануари. Главната цел на протестот е зголемување на платите за најмалку 6.000 денари, односно зголемување на минималната плата на 600 евра.
Протестот ќе започне во 17 часот пред Работничкиот дом во Скопје, по што учесниците ќе се упатат кон Собранието, Стопанската комора и зградата на Владата. Организаторите информираат дека ќе биде обезбеден коридор за итни случаи, со цел протестот да помине мирно, но јасно и гласно.
