Силна експлозија предизвика голем пожар во складиште за оружје во централна Бугарија, во близина на селото Царева Ливада, а засега нема информации за повредени. Пожарот избувнал во текот на ноќта и се проширил низ магацинскиот дел на фабриката, од едно складиште кон друго, соопшти регионалната гувернерка на Габрово, Кристина Сидорова.
Според бугарските медиуми, објектот го користи компанијата ЕМКО, која и минатиот месец беше погодена од експлозија во друг свој погон. ЕМКО е во сопственост на бугарскиот трговец со оружје Емилијан Гебрев, чии објекти и претходно биле цел на напади кои бугарското обвинителство ги поврзува со руски оперативци.
Бугарија во 2024 година издаде налози за апсење на шестмина руски државјани поради сомнение за вмешаност во уништување складишта на ЕМКО во периодот од 2011 до 2020 година. Во дел од тие складишта се чувала муниција наменета за извоз во Украина и Грузија.
Бугарските обвинители претходно изнесоа сомневање дека експлозиите во земјата, обидот за труење на Гебрев во 2015 година и експлозиите во складишта за муниција во Чешка во 2014 година се меѓусебно поврзани.
Москва ги отфрла ваквите обвинувања, а причината за најновата експлозија засега не е соопштена.
