Покрај формалната, неопходна е и реална заштита на жените од насилство, порача претседателката Гордана Сиљановска-Давкова на јавната расправа за имплементацијата на Истанбулската конвенција, организирана од собраниската Комисија за еднакви можности на жените и мажите.
Таа истакна дека Извештајот на Државниот завод за ревизија прецизно ги прикажува состојбите на терен и укажува на сериозни системски недостатоци во примената на Конвенцијата.
Меѓу клучните препораки што ги посочи се итно донесување на Националната стратегија 2026–2033, проширување на мрежата на засолништа, обезбедување долгорочна финансиска поддршка за жртвите, воведување стандарди во услугите што ги нудат центрите за социјална работа и вработување стручен кадар со континуирана обука. Таа побара и побрзо лиценцирање на СОС-линиите, како и програми за психосоцијален третман не само за жртвите, туку и за сторителите.
Сиљановска-Давкова укажа дека е неопходно воведување јасни критериуми за распределба на финансиските средства, врз основа на претходна анализа на трошоците. Таа нагласи дека мора да се заостри казнената политика во однос на семејното насилство и фемицидот.
Според неа, жените често остануваат незаштитени во критични моменти поради дисфункционалност и некоординираност меѓу институциите. Како последица, бројот на случаи на фемицид расте, довербата во институциите опаѓа, а државата го нарушува својот кредибилитет во исполнувањето на меѓународните обврски.
Учесниците во јавната расправа, повикувајќи се и на статистичките податоци на МВР, се заложија за системски промени насочени кон превенција на семејното насилство и ефикасен одговор на кривичните дела поврзани со насилството.
На седницата се обратија претседателката на Комисијата Жаклина Пешевска, потпретседателката на Собранието Весна Бендевска, заменик-министерот за социјална политика, демографија и млади Ѓоко Велковски и помошничката на главниот државен ревизор Катерина Чалоска Алексовска. Во дискусијата учествуваа претставници од национални и локални институции, граѓански организации и меѓународни тела.
