Уште едно лице е затекнато синоќа како фрла градежен шут и кабаст отпад околу контејнерите во Скопје, по двата претходно регистрирани случаи на несовесно одлагање отпад. Според градоначалникот Орце Ѓорѓиевски, станува збор за лице од Кисела Вода кое веќе е санкционирано.
„Додека нашите екипи деноноќно работат за почист град, поединци го уништуваат сработеното и ја загадуваат околината во која сите живееме“, напиша Ѓорѓиевски на Фејсбук.
Тој порача дека таквата неодговорност нема да помине без санкции и дека останува на ставот за „нулта толеранција за секој што ги претвора јавните површини во депонии и го загрозува здравјето на граѓаните“.
Градоначалникот најави дека ваквите контроли ќе продолжат и дека прекршителите ќе бидат санкционирани.
Паралелно се најавува и постапка за поставување камери на јавните површини, со цел побрзо откривање и санкционирање на лицата што непрописно фрлаат отпад.
