Полициски службеници на Граничниот премин Табановце лишиле од слобода 39-годишен возач од Шведска, откако било утврдено дека на автопатот А1 возел со 175 километри на час. Според МВР, прекршувањето било регистрирано преку системот „Безбеден град“ во близина на Демир Капија, на делница каде максимално дозволената брзина е 80 километри на час.
Возачот управувал со „фолксваген“ со српски регистарски ознаки, а бил запрен на 27 август околу 16 часот при обид да излезе од државата преку Табановце. При проверката било утврдено дека М.С. (39) е евидентиран како сторител на кривично дело „безобѕирно управување со моторно возило“ по член 297-а од Кривичниот законик. Тој бил лишен од слобода, а од МВР најавуваат дека против него ќе биде поднесена соодветна кривична пријава.
