При посетата на Дневниот центар за поддршка на деца и семејства во ризик „Гнездо“ во Скопје, кандидатката за градоначалник на Скопје од СДСМ, Каја Шукова, оствари средба со програмската директорка на невладината организација „Новинари за човекови права“, Наташа Доковска.
Со претставниците на „Новинари за човекови права“, кои го спроведуваат проектот „Гнездо“, Шукова разговараше за потребите на најранливите категории и за можностите преку програмите за социјална заштита да се зголеми грижата на градот за нив.
„Како иден градоначалник, ќе се борам и ќе застанам зад секое дете, зад секоја мајка, зад секој човек кој се чувствува заборавен. Тие ќе бидат мој приоритет. Скопје мора да биде град што се грижи – град на еднакви можности, град на достоинство, град на солидарност. Затоа што тоа е Скопје што го заслужуваме сите ние. И заедно, ќе го изградиме“, рече Шукова.
