Лукот е неизбежна состојка во кујните ширум светот, а неговата употреба датира со илјадници години, не само за збогатување на вкусот на јадењата, туку и како дел од народната медицина за превенција на настинки и инфекции. Денес науката сè повеќе го потврдува она што одамна се знае – лукот и суплементите базирани на него имаат значајни придобивки за здравјето, пишува Health.com.
Јакнење на имунитетот и борба против настинки
Истражувањата покажуваат дека лукот може да го зајакне имунолошкиот систем и да го намали траењето на симптомите на настинка. Се смета дека го стимулира создавањето на клетки кои се клучни во борбата против вируси и бактерии. Неколку студии покажаа дека редовната консумација на лук може да ги намали отсуствата од работа или училиште и да го спречи размножувањето на вирусите во организмот.
Намалување на висок крвен притисок
Додатоците во исхраната со лук можат значително да го намалат крвниот притисок, со што се редуцира ризикот од срцев или мозочен удар од 16 до 40 проценти. Алисцинот, активното соединение во лукот, помага во намалување на хормоните кои предизвикуваат покачување на крвниот притисок.
Лукот и ризикот од Алцхајмерова болест
Неколку истражувања укажуваат дека лукот може да го намали оксидативниот стрес и да понуди заштита од Алцхајмерова болест и други форми на деменција. Потенцијално има заштитно дејство и кај Паркинсонова болест, Хантингтонова болест и одредени видови мозочен удар, но се потребни дополнителни научни докази.
Подобрување на холестеролот
И свежиот лук и суплементите може да го намалат LDL-холестеролот. Некои студии покажуваат дека редовниот внес на лук подолго од два месеци може да го намали холестеролот до 10 проценти.
Долговечност
Кинеска студија открила дека луѓето кои редовно јадат лук живеат подолго од оние кои го консумираат ретко. Истражувачите претпоставуваат дека ова е резултат на позитивните ефекти врз имунитетот, здравјето на срцето и потенцијалното намалување на ризикот од рак.
Здравје на коските
Студија од 2017 година покажала дека суплементите со лук ја зголемуваат апсорпцијата на калциум. Истражување од 2018 година открило дека само 1 грам дневно лук може да ги намали болките во коленото кај лица со остеоартритис.
Заштита од тешки метали
Суплементите со лук може да помогнат во намалување на токсичните ефекти од тешките метали како оловото. Една студија покажала дека работници изложени на олово успеале да ја намалат токсичноста за 19 проценти со редовен внес на лук.
Антиканцерогено дејство
Лукот содржи соединенија за кои истражувањата сугерираат дека имаат антиканцерогени својства. Студија од 2021 година открила дека луѓето кои редовно јадат лук имаат 54 проценти помал ризик од рак на панкреасот.
Дијабетес и метаболички синдром
Истражувањата покажуваат дека лукот може да го подобри нивото на глукоза во крвта за само една до две недели. Исто така може да помогне во намалувањето на холестеролот и на телесната тежина кај пациенти со метаболички синдром.
PCOS – синдром на полицистични јајници
Студија од 2023 година покажала дека суплементите со лук можат да им помогнат на лицата со PCOS да го намалат индексот на телесна маса, опсегот на струкот и телесната тежина.
Антибактериско и антифунгално дејство
Многу студии потврдиле дека лукот е ефикасен против различни бактерии и габични инфекции, вклучувајќи и случаи на вагинитис и инфекции од Candida albicans.
Дали треба да земате суплементи со лук?
Додека суплементите со лук генерално се сметаат за безбедни, можно е да го зголемат ризикот од крварење, особено кај луѓе кои земаат антикоагуланси или аспирин. Секогаш е препорачливо да се консултирате со лекар пред да започнете со суплементација.
