Од СДСМ реагираат дека Владата не ја кажала вистината за трошоците за одбележувањето на 35 години независност на Македонија, обвинувајќи го премиерот Христијан Мицкоски дека претходно тврдел оти за прославата не бил потрошен ниту еден денар од државниот буџет.
Од партијата наведуваат дека, според информациите кои беа објавени, за реализацијата на настаните биле обезбедени над 5 милиони евра преку АД Државна лотарија, компанија во целосна државна сопственост.
„Не се 0 денари, како што тврдеше Мицкоски, туку над 5 милиони евра се потрошени за прославата на независноста“, велат од СДСМ.
Опозициската партија бара од Владата да ги објави сите детали за исплатите, компаниите кои добиле средства и критериумите според кои биле избрани.
Од СДСМ поставуваат прашања колку средства биле исплатени за организација на настаните, дали имало провизии и дополнителни трошоци, како и кој бил корисник на парите.
„Граѓаните имаат право да знаат каде завршиле средствата и кој добил милионски суми“, се наведува во соопштението.
Од партијата додаваат дека транспарентноста за трошењето на јавните средства е неопходна и бараат целосно објавување на договорите и исплатите поврзани со прославата.
