СДСМ реагира на изјавите на премиерот Христијан Мицкоски за „талогот“ и „елитата“, обвинувајќи дека власта, како што велат од партијата, ги омаловажува сите оние кои имаат поинакво мислење.
Од СДСМ наведуваат дека секој што се залага за европски вредности, демократија, слобода на говор и подобар животен стандард, според нив, се става во категоријата „талог“.
„Граѓаните не се талог. Граѓаните се сопственици на оваа држава“, стои во соопштението на опозициската партија.
Од СДСМ упатуваат критики кон владејачката партија и обвинуваат за, како што наведуваат, обиди за контрола на медиумите, политички влијанија и создавање поделби во општеството.
Во реакцијата се тврди дека власта се обидува да создаде слика за себе како „елита“, додека граѓаните, според СДСМ, се соочуваат со проблеми поврзани со животниот стандард, платите и реформите.
Од партијата упатуваат и обвинувања за нетранспарентност, влијанија врз институциите и коруптивни практики, повикувајќи ја власта да одговара пред јавноста.
„Нема одговори на прашања – има само навреди. Се однесуваат како државата да е нивна приватна сопственост“, велат од СДСМ.
Од опозициската партија додаваат дека граѓаните ќе ја вратат власта во свои раце и дека, како што наведуваат, одговорност ќе има за сите кои ја злоупотребиле функцијата.
