Обемната администрација на Град Скопје му тежи на градот. Новиот градоначалник веќе отстрани од работа 500 лица од јавни претпријатија. Не оделе на работа со месеци, дури и години, а земале плата.
Има ли уште такви џаболебари кои треба да се отпуштат од работа?
Ова е прашање на кое градоначалникот треба да даде одговор. И не само тоа, Орце Ѓорѓиевски треба што поскоро да се зафати со реаогранизација и намалување на гломазната градска администрација сосе јавните претпријатија која брои речиси 10.000 вработени. Тоа е цела армија, а на терен не се гледа дека ги гази проблемите кои ги тиштаат скопјани.
На пример, ако веќе се кажува дека ЈП „Водовод и канализација“ е загубар, може ли тоа да се решава и со помалку од сегашните над илјада вработени? А така е и во многу други претпријатија, а така е и во седиштето на градоначалникот. Ова чистење не треба да се одлага како што правеа претходните градоначалници до сега.
