Протестите во повеќе италијански градови прераснаа во тензични сцени, откако илјадници работници, студенти и синдикалци излегоа на улиците во рамки на националниот штрајк против трошоците за живот, ниските плати и зголемените воени расходи.
Во Торино дојде до судири меѓу демонстранти и полицијата, која употреби солзавец и водени топови за да ги растера насобраните граѓани. Во близина на Префектурата, дел од демонстрантите фрлале јајца и димни бомби кон полициските кордони.
Тензиите се зголемија и во Џенова, каде што демонстрантите го блокираа пристапот до пристаништето со поставување и палење гуми, додека во Неапол протестниот марш се упати кон централната железничка станица, која беше обезбедувана од полицијата и карабинерите.
Во Болоња, пак, студенти блокираа влезови на неколку средни училишта, со што беше нарушено нормалното одвивање на наставата.
Протестите се дел од 24-часовниот генерален штрајк организиран од синдикатот УСБ, во кој учествуваат вработени од јавниот и приватниот сектор, студенти, средношколци и синдикални организации.
Демонстрантите бараат зголемување на платите во согласност со растот на инфлацијата, подобрување на животниот стандард и поголеми инвестиции во образованието, здравството и јавните услуги. Тие се противат и на зголемувањето на средствата за воени цели.
Во Милано, според синдикатот, на протестот учествувале над 100 илјади лица, додека организаторите тврдат дека бројот на учесници на национално ниво достигнал околу два милиони.
Во текот на протестите имаше и политички пораки. Во Падова беше запалена фотографија на министерот за образование Џузепе Валдитара, додека во Неапол демонстранти запалија слика со премиерката Џорџа Мелони и министерката за универзитети Ана Марија Бернини.
Штрајкот го опфати и здравствениот сектор, но итната медицинска помош и минималните услуги продолжија да функционираат.
Министерот за транспорт Матео Салвини претходно побара одложување на штрајкот, повикувајќи се на совпаѓањето со празниците Денот на сите светци и Денот на мртвите. Синдикатот УСБ го отфрли барањето и најави дека протестите ќе продолжат.
