Според неофицијални информации, вечерва е во тек полициска опсада на повеќе објекти и локации во Струмица и струмичкиот регион. Истовремено, објект во Скопје, лоциран во поранешниот индустриски комплекс „Охис“, уште од четврток навечер е целосно под контрола на надлежните институции.
Во акцијата се вклучени повеќе државни органи, меѓу кои полицијата, царинските служби, здравствените инспекторати и јавното обвинителство. Според сознанијата, фокусот е насочен кон мрежа која со години работела под привид на легално производство, но постојат сериозни сомнежи дека била користена за нелегален извоз и остварување противзаконска добивка.
Иако засега нема официјални соопштенија од институциите, нема ниту деманти, што дополнително ја засилува тежината на случајот. Според извори блиски до истрагата, токму ваквиот институционален молк укажува дека овојпат се работи за координирана и чувствителна акција, без протекување информации, политички влијанија или калкулации.
Дополнителни сомнежи отвори и изјавата на премиерот Христијан Мицкоски, кој денеска, одговарајќи на новинарски прашања, одби да навлегува во детали за марихуаната запленета во Србија. Овој став се толкува како индиректна потврда дека Министерството за внатрешни работи спроведува обемна и сериозна операција со пошироки импликации.
