Уште еден пациент со западнонилска треска почина на Клиниката за инфективни болести, со што продолжува серијата тешки случаи поврзани со ова заболување.
Станува збор за 70-годишен пациент од скопската Општина Аеродром, кој имал и повеќе придружни заболувања. Директорот на Клиниката, д-р Фадил Цана, информираше дека пациентот 57 дена бил лекуван на Одделот за интензивна нега, но и покрај преземените медицински мерки, починал во текот на викендот.
Во моментов на Клиниката се лекуваат седум пациенти со западнонилска треска. Двајца од нив се во потешка клиничка состојба и се сместени на Одделот за интензивна нега, откако кај нив дошло до влошување на здравствената состојба. Еден од пациентите уште при приемот бил во тешка состојба.
Според д-р Цана, од 25 септември е регистриран само еден нов потврден прием. Последниот примен пациент е од Росоман, додека останатите хоспитализирани главно се од Скопје.
Лекарите посочуваат дека сите пациенти кои се лекуваат на Клиниката се повозрасни лица и имаат дополнителни придружни заболувања, што го зголемува ризикот од потешка клиничка слика.
