Со сослушување на сведоци на предлог на Јавното обвинителство, во судницата во Идризово денеска продолжува судењето за пожарот во кочанската дискотека „Пулс“, во кој загинаа 63 лица, а над 200 беа повредени.
На претходните рочишта беа сослушани повеќе сведоци кои кобната вечер биле присутни во објектот, а за денешното рочиште е најавено сведочење на уште пет лица.
Обвинетите, кои изјавија дека не се чувствуваат виновни, преку своите адвокати ја оспорија основаноста на обвинението. Според одбраната, тие не презеле дејства што би можеле да доведат до пожарот, поседувале валидна документација и трагедијата, како што тврдат, е резултат на институционални пропусти, а не на индивидуална вина. Најавено е изведување дополнителни докази и сведоци во прилог на оваа теза.
Пожарот избувна на 16 март 2025 година за време на настап на групата ДНК во дискотеката „Пулс“ во Кочани. Во објектот имало повеќе посетители од дозволеното, меѓу кои и малолетници, а биле активирани пиротехнички средства без дозвола. Според обвинението, објектот работел незаконски повеќе од една деценија, без исполнување на минимални технички услови и без соодветен систем за противпожарна заштита.
За несреќата се обвинети над 30 физички и три правни лица, меѓу кои сопственици и управители на локали, инспектори, поранешни градоначалници, лица од обезбедување и државни службеници.
Судењето го води судијката Диана Груевска Илиевска, а обвинителството е застапувано од тим од 15 јавни обвинители.
