Голем одрон значително го отежнува сообраќајот на патниот правец Скопје – Велес. Граѓани преку социјалните мрежи споделија фотографии од одронот, на кои се гледа дека дел од коловозот е покриен со земја и камења, што претставува сериозна опасност за возачите.
Од Македонија пат апелираат учесниците во сообраќајот да се движат со прилагодена брзина, строго да ја почитуваат поставената сообраќајна сигнализација и да управуваат со зголемена внимателност, особено на критичните патни делници.
Предупредувањето е особено важно за патиштата кои минуваат низ котлини, речни долини и клисури, каде постои зголемен ризик од нови одрони. Како потенцијално ризични се наведуваат делниците Катланово – Велес, Маврово – Дебар – Струга, Виница – Берово и Кочани – Делчево.
Надлежните служби се очекува да интервенираат за расчистување на одронот, а возачите се повикуваат да ја следат актуелната состојба на патиштата и официјалните соопштенија.
