ГРК Охрид за првпат во својата историја успеа да го совлада РК Вардар, славејќи со 26-24 во натпревар од 8. коло во плеј-офот од ракометната Суперлига.
Првото полувреме донесе израмнета игра, но скопскиот тим имаше минимална контрола и на паузата замина со предност од 12-14. На стартот од вториот дел Вардар стигна и до највисоки плус четири (12-16), но потоа следуваше целосен пресврт на домашниот состав.
Охриѓани одиграа одличен период во кој направија серија од 9-1 и го презедоа водството со 21-17, што се покажа како клучно за историскиот триумф против новиот шампион.
Во вториот натпревар одигран денеска, РК Алкалоид ја оправда фаворитската улога и славеше на гостувањето кај ГРК Тиквеш со 23-30. Тимот од Автокоманда до победата стигна со силна завршница во второто полувреме.
Во претходното коло, Еурофарм Пелистер беше подобар од РК Бутел.
На табелата нема промени – Вардар останува сигурен на првата позиција до крајот на сезоната, додека Охрид е втор со два бода предност пред Еурофарм Пелистер. Алкалоид ќе заврши на четвртото место, со шест бода помалку од битолскиот тим.
