Вицепремиерот и министер за транспорт Александар Николоски денеска престојуваше во работна посета на Струмица, каде со градоначалникот Петар Јанков разговараше за тековните инфраструктурни проекти и идните планови за развој на општината.
На средбата присуствувале и претставници од општинската администрација, како и пратениците Ели Панова и Жан Дрвошанов.
Од Министерството за транспорт информираат дека преку ресорот што го предводи Николоски, во Струмица во моментов се реализираат инфраструктурни проекти со вкупна вредност над седум милиони евра.
Меѓу позначајните инвестиции е изградбата на атмосферска канализациска мрежа во населеното место Просениково, проект чија вредност изнесува 46,6 милиони денари.
На состанокот биле разгледани и прашања поврзани со патната и комуналната инфраструктура, како и проектите што Владата ги поддржува во струмичкиот регион.
Како една од најзначајните идни инвестиции се издвојува изградбата на експресниот пат Радовиш – Струмица – Ново Село – граница со Бугарија. За реализација на овој проект веќе е започната постапка за избор на проектантска и консултантска компанија која треба да ја изработи потребната документација.
Во рамки на подготовките се предвидени изработка на предпроектни анализи, еколошки и социјални студии, како и физибилити студија. По завршувањето на овие активности, треба да следува постапка за избор на изведувач и почеток на градежните работи.
Според претходните најави на Николоски, експресниот пат треба да се финансира со средства на Јавното претпријатие за државни патишта, а целта е трасата да не завршува во Струмица, туку да продолжи преку Ново Село до македонско-бугарската граница.
Од Министерството за транспорт посочуваат дека инвестициите имаат цел подобрување на патната и комуналната инфраструктура, како и создавање подобри услови за граѓаните и за локалниот економски развој.
