Кога станува збор за купување авионски билети, долго време важеше правилото дека најисплатливо е да се резервира што е можно порано. Сепак, најновите анализи покажуваат дека трендовите во патувањата се менуваат и дека вистинската заштеда зависи од точниот тајминг – и на резервацијата и на патувањето.
Според извештајот „Air Hacks 2026“ на Expedia, јуни е моментално најповолниот месец за летање. Податоците, базирани на милиони резервации, покажуваат дека билетите во јуни можат да бидат во просек до 68 проценти поевтини во споредба со декември, што значи заштеда од околу 300 евра по билет. Од друга страна, јануари е најмалку прометен месец на аеродромите, додека август останува најфреквентен.
Истражувањето открива и промени во цените во зависност од денот на патување. Во моментов, петок се издвојува како најповолен ден за летање, со можни заштеди до 18 проценти во споредба со сабота. Кај бизнис класата, најисплатливо е патувањето во четврток, кога цените се во просек за 17 проценти пониски отколку во недела, која важи за најскап ден. Вторник, пак, се покажал како ден со најмал метеж на аеродромите.
Кога станува збор за резервацијата, експертите не препорачуваат ниту прерано купување, ниту чекање до последен момент. За домашни летови во економска класа, најдобро е билетот да се купи помеѓу 31 и 45 дена пред поаѓањето, при што може да се заштедат околу 46 евра во споредба со купување шест месеци однапред. За меѓународни летови, најголемата заштеда – околу 112 евра – се постигнува ако билетот се резервира 15 до 30 дена пред патувањето. Дури и резервација 31 до 45 дена однапред носи значителна разлика во цената.
Интересно е што недела се покажала како најповолен ден за купување авионски билети.
Анализата издвојува и конкретни датуми со најмал и најголем сообраќај. Меѓу најмалку прометните се 4, 5 и 9 март, како и 31 декември, додека 24 и 25 октомври, 24 мај и 22 август се меѓу најпрометните денови во годината.
Заклучокот е јасен – внимателното планирање може значително да ги намали трошоците за патување. Наместо автоматски да резервирате многу однапред, вреди да се следат трендовите и да се избере вистинскиот период за купување и летање.
