Македонската ракометна репрезентација уште еднаш покажа дека заслужено припаѓа на големата сцена, откако со две убедливи победи и вкупна разлика од 22 гола ја елиминира Словачка во баражот и обезбеди пласман на Светското првенство. Ова ќе биде десетто учество на Македонија на мундијалите и осмо во низа од 2013 година наваму.
По убедливата победа во Скопје, селекторот Кирил Лазаров не го криеше задоволството од настапот на своите избраници, потенцирајќи дека резултатот е доказ за огромниот напредок на оваа генерација.
„Сакам да им честитам на момците за денешните 15 гола разлика, таа разлика не се постигнува туку-така. Мора да бидеме задоволни без разлика на нивото на ривалот Словачка. Презадоволен сум од пристапот на двата натпревара од сите играчи“, изјави Лазаров.
Тој посочи дека во изминатите година и пол бил создаден тим кој функционира како вистинска целина и во кој најважен е колективниот успех.
„Успеавме да составиме тим на играчи кои се борат еден за друг, дисциплинирани се, не е важно кој е најдобар, важно е да победуваме. Се мачевме многу да дојдеме до ова и сега мора да го задржиме тоа“, истакна селекторот.
Лазаров нагласи дека голема улога во развојот на репрезентативците има и домашното првенство, каде играчите добиваат важни натпревари и искуство.
„Мислам дека играчите растат со нашата лига, во нивните клубови, со квалитетни натпревари добиваат на искуство“, рече тој.
Селекторот потсети дека откако ја презеде репрезентацијата, Македонија обезбедила настап на шест големи натпреварувања по ред, иако генерацијата е речиси целосно променета.
„Откако јас сум селектор, ова е шесто големо натпреварување во низа, со 99 проценти променета генерација од претходно. Тој процес треба да се истрпи, а ние успеавме во тој период со стручниот штаб, со РФМ и со медиумите да опстанеме на големата сцена и да создадеме производ кој ќе ја прави горда Македонија во следната деценија“, порача Лазаров.
Македонија со ова уште еднаш потврди дека останува редовен учесник на најголемите ракометни натпреварувања, а новата генерација најавува дека иднината на македонскиот ракомет е во сигурни раце.
