За денеска е закажана седница на Постојаната анкетна комисија за заштита на слободите и правата на граѓаните во Собранието, по иницијатива на родителите на младите кои загинаа во пожарот во кочанската дискотека „Пулс“.
Семејствата на жртвите бараат присуство од сите пратеници и надлежни институции, потенцирајќи дека трпението им е при крај и дека нема оправдување за ново одложување. Според нив, денешната седница е единствената можност тие директно да се обратат пред законодавниот дом.
Опозициските партии предупредуваат на ризик од недостиг на кворум, доколку пратениците од владејачкото мнозинство не присуствуваат, што би ја довело во прашање самата седница.
И покрај предлогот на претседателот на Собранието седницата да се одложи поради актуелната расправа за буџетот, од партијата „Левица“, од каде што пратеникот Димитар Апасиев претседава со Комисијата, остануваат на првично закажаниот термин.
Во меѓувреме, Собранието веќе има формирано и посебна анкетна комисија која треба да ги испита околностите околу најголемите трагедии во изминатите години, меѓу кои и пожарот во дискотеката „Пулс“.
