Голем пожар, потпомогнат од силниот ветер, попладнево се прошири од преспанската страна и навлезе на територијата на Националниот парк „Пелистер“. Пожарот започнал во поширокото подрачје на Долна Бела Црква и Макази, а огнот зафатил нискостеблеста и борова шума и брзо напредувал кон границите на националниот парк.
Директорот на НП „Пелистер“, Иванчо Тошевски, информира дека пожарот веќе навлегол во паркот, помеѓу подножјето на врвот Вртушка и врвот Мала Чука. На терен се пожарникари од Ресен и Битола, екипи на Националниот парк, „Македонски шуми“ и Дирекцијата за заштита и спасување, а дополнително е испратена и механизација за правење противпожарни пресеки. Поради непристапниот терен и брзото ширење на огнот, во гаснењето се вклучени и „Ер тракторите“ на ДЗС, како и два огнени тима со пинцгауери.
Директорот на ДЗС, Стојанче Ангелов, изјави дека постојат индиции оти пожарот бил намерно подметнат, бидејќи огнот првично се појавил на најмалку две одделни локации во овоштарници со јаболка, а потоа се формирала подолга огнена линија. Надлежните ја оценуваат ситуацијата како сериозна, особено поради силниот ветер, непристапниот терен и опасноста огнот дополнително да се прошири низ шумскиот појас на Пелистер.
