Во вторникот вечер во хотел „Холидеј Ин“ во Скопје, со почеток во 20 часот, се одржа премиерата на документарниот филм „Вратете ни го чаламот“, посветен на најголемите успеси и славната историја на македонскиот кошаркарски клуб „Работнички“.
Филмот, во продукција на „Слобода филм“ и финансиски поддржан од Општина Центар – Скопје, собра голем број спортски новинари, кошаркарски легенди и сегашни членови на тимот, кои со многу емоции го проследија ова документарно сведоштво за еден од најстарите и најуспешни спортски колективи во земјава.
Премиерата ја отвори легендарниот спортски новинар Атанас Костовски, кој со носталгија се потсети на првите телевизиски преноси и на славните денови на „Работнички“ во Градски парк.
Градоначалникот на Општина Центар, Горан Герасимовски, нагласи дека филмот не е само потсетник на минатото, туку и инспирација за иднината:
„Легендата продолжува да живее! Се враќаме на гордоста, на спомените и на победничкиот дух што ’Работнички’ го носи уште од првиот ден. Горд сум што дадов поддршка за реализација на овој филм и што заедно со клубот го враќаме чаламот – со нова сала и нови победи,“ истакна Герасимовски.
Во документарецот зборуваат кошаркарските великани кои го создале клубот и биле дел од неговите најуспешни години – меѓу нив и учениците на легендарниот тренер Лазар Лечиќ, како и протагонистите што ја продолжиле традицијата – Благоја Георгиевски – Буштур, Драган Таневски, Борис Дамјановски и други.
Режисерот Игор Иванов – Изи, познат по својата способност да долови човечки приказни со топлина и реализам, успеал да го спои фактографското со емотивното, нудејќи филм кој не само што документира успеси, туку и ја доловува страста, лојалноста и љубовта кон кошарката што ја одржала „Работнички“ жив повеќе од седум децении.
Публиката ја поздрави проекцијата со долги аплаузи, а многумина со носталгија зборуваа за времињата кога во салата во Градски парк се бараше билет повеќе. Таа сала денес повторно се обновува благодарение на Општина Центар – симболично продолжувајќи ја приказната за „враќањето на чаламот“.
„Вратете ни го чаламот“ не е само филм за спорт – тоа е филм за идентитет, истрајност и гордост, за генерациите кои го граделе клубот и за младите кои ја продолжуваат традицијата. Настанот остави впечаток на враќање кон времињата кога спортот значеше заедништво, страст и чест, а „Работнички“ беше и останува – симбол на македонската кошарка.
Фото: П.С.Т.
