Модернизираниот аеродром „Св. Апостол Павле“ во Охрид доби целосно нов изглед во кој современата функционалност е споена со културното и историското богатство на Охрид. Ѕидовите и просториите на терминалот се украсени со силна локална симболика, па патниците уште при пристигнувањето добиваат впечаток дека влегуваат во мал музеј.
Посебно место заземаат репликите на старите мозаици пронајдени во охридската Варош и на Плаошник, кои се вградени во новото визуелно решение на аеродромот.
Во терминалот е поставена и реплика на фреска од катедралната црква „Света Софија“, со што е претставено уште едно од најзначајните обележја на културното наследство на Охрид.
Вицепремиерот и министер за транспорт Александар Николоски оцени дека аеродромот сега, покрај својата основна функција, претставува и мал музеј кој пред домашните и странските патници го претставува регионот.
Културните мотиви се дел од пошироката модернизација вредна 2,7 милиони евра, со која се реконструирани патничкиот терминал и чек-ин просторот, проширени се зоните за безбедносна контрола и рачен багаж и е воведена современа опрема.
На овој начин „Св. Апостол Павле“ станува своевидна порта кон Охрид, во која патниците уште на аеродромот се запознаваат со дел од историјата, уметноста и културното богатство на градот.
