Со затоплувањето на времето во Скопје, покрај зголемениот број пешаци и велосипедисти, се почести се и лицата на електрични тротинети. А тие пак наместо алтернатива за мобилност и растеретени улици со автомобили, се повеќе стануваат извор на дополнителен сообраќаен хаос. Не се проблем само малолетниците кои немаат никакво познавање на правилата, а најчесто не користат ниту основна заштитна опрема, туку и возрасни кои возат пребрзо игнорирајќи ги основните сообраќајни прописи.
Ако камерите на „Сејф сити” ги контролираат возачите на автомобили, тогаш кој ги контролира тротинетџиите? Оти секојдневно гледаме како се движат по тротоари со голема брзина, се провлекуваат меѓу пешаци и директно ја загрозуваат нивната безбедност, а често излегуваат и на улиците помеѓу возилата.
Иако, законски е регулирано кој и како може да управува со електричен тротинет, примената на регулативата е речиси невидлива. Контролата е слаба, санкциите ретки, а впечатокот е дека секој може да вози како сака и каде сака.
Скопје и онака се соочува со сообраќаен хаос, па не смее да дозволи уште еден нерегулиран ризик на улиците. Надлежните институции мора да реагираат и да ставaт крај на безредието со електричните тротинети.
