Голем број улици и булевари во Скопје утре ќе бидат под посебен сообраќаен режим поради одржувањето на 22. Виз Ер Скопски маратон.
Од 6:00 до 14:00 часот дел од сообраќајниците по трасата на трката ќе бидат затворени, а возилата ќе се пренасочуваат по алтернативни правци, информираат организаторите.
Посебен режим ќе има на потегот од Рекорд, каде ќе бидат опфатени улиците „Македонија“ и „Димитрие Чуповски“, потоа булеварот „Митрополит Теодосиј Гологанов“ и улицата „Васил Чакаларов“ до подрачјето на Хром.
Затворени за сообраќај ќе бидат и делови од улицата „11 Октомври“, односно делот од Собранието кон Црвен крст, како и делови од булеварите „Крушевска Република“ и „Трета македонска бригада“ до областа кај Американ колеџ.
Во општина Аеродром со изменет режим ќе бидат опфатени улиците и булеварите кон Воен базен, Мајчин дом и булеварот „Јане Сандански“, до крстосницата со булеварот „Србија“.
Од МВР информираат дека пренасочувањето на возилата ќе се врши во зависност од движењето на учесниците во маратонот, а возачите се повикуваат да ги избегнуваат трасите на трката во наведениот период.
Полицијата апелира до граѓаните да ги почитуваат упатствата на службените лица на терен и навреме да го планираат своето движење низ градот.
Организаторите упатија апел за разбирање поради привремените ограничувања и ги повикаа граѓаните да користат алтернативни сообраќајни правци.
