Лана Понтинг, која во тинејџерските години била лекувана еден месец во Институтот „Алан Меморијал“, изјавила дека била подложена на тајни експерименти од страна на Централната разузнавачка агенција на САД во таа поранешна психијатриска болница во Монтреал, Канада.
Таа поради тоа ја тужела ЦИА.
Понтинг тврди дека во болницата, каде што била сместена еден месец во април 1958 година, откако наредил судија, таа, тогаш шеснаесетгодишна, да се подложи на третман за „непослушно“ однесување, станала една од илјадниците луѓе врз кои биле вршени експерименти како дел од строго доверливото истражување на ЦИА за контрола на умот.
Таа е една од двајцата именувани тужители во групна тужба поднесена од канадски жртви на експериментите и тврди дека откако била примена во болницата, станала, без да знае во тоа време, учесник во тајните експерименти на ЦИА познати како „МК-Ултра“.
Странските медиуми објави дека за време на Студената војна, ефектите од психоделичните дроги како што се ЛСД, електрошокови и техники на перење мозок биле тестирани врз луѓе без нивна согласност во повеќе од 100 институции – болници, затвори и училишта во Соединетите Американски Држави и Канада.
Понтинг изјавила дека слушала континуирани снимки од „ти си добра девојка, ти си лоша девојка“ кои се повторувале одново и одново.
Медицинските картони покажуваат дека на Лана Понтинг ѝ бил даван и ЛСД, како и дроги како што се натриум амитал, барбитурати, деоксин, стимуланси, како и азотен оксид, седатив познат како гас за смеење.
Суровата вистина за експериментите МК-Ултра првпат излегла на виделина во 1970-тите, а оттогаш неколку жртви се обиделе да ги тужат САД и Канада.
Тужбите во САД биле во голема мера неуспешни, но во 1988 година канадски судија ѝ наложил на американската влада да им исплати на девет жртви по 67.000 долари (57.623 евра), а во 1992 година канадската влада им исплатила по 100.000 канадски долари (околу 68.804 евра во тоа време) на секоја од 77-те жртви, но не ја признала одговорноста.
Фото: Pixabay
