Крушево продолжува со реализација на низа инфраструктурни, туристички и комунални проекти, меѓу кои изградба на нова спортска сала, реконструкција на Крушевската чаршија, подобрување на водоснабдувањето, нови полетувалишта за параглајдери и пристапна улица до скијачките терени.
Градоначалникот Нико Чонески информираше дека изградбата на пристапната улица до скијачките терени е во тек, а во следната фаза таа треба да се поврзе со планираната обиколница околу градот. Обиколницата е во тендерска постапка и има за цел да го намали сообраќајниот метеж, особено движењето на тешките товарни возила низ централното градско подрачје.
Во меѓувреме се подготвува и нов сообраќаен проект кој треба да обезбеди дополнителни паркинг-места и подобра организација на сообраќајот во градот.
Во областа на водоснабдувањето се изработува студија за намалување на загубите на вода и утврдување на најкритичните делови од мрежата што ќе бидат реконструирани. Веќе е завршена реконструкцијата на пумпната станица, а во тек е постапка за набавка и замена на хидро и електроопремата.
Општината започнува и со воведување систем за селекција на комунален отпад, по што е предвидена изградба на центар за селекција. До крајот на септември комуналното претпријатие треба да добие нов ровокопач-натоварувач, а веќе е набавено и ново специјализирано возило за собирање отпад.
Во туристичкиот сектор се финализираат две нови полетувалишта за параглајдери, со што значително ќе се зголеми капацитетот на параглајдинг-центарот во Крушево. Истовремено се уредува спортско-рекреативниот центар „Гумење“, каде се гради детски рекреативен парк, како и просторот околу Крушевското Езеро.
Во план е и реконструкција и ревитализација на Крушевската чаршија, додека подготовката на техничката документација за обнова на Градскиот пазар е во завршна фаза.
Со финансиска поддршка од Министерството за спорт ќе започне и изградбата на нова повеќенаменска спортска сала.
Паралелно, општината работи на изработка на Генерален урбанистички план за дел од Крушево, Детален урбанистички план за контактната зона на градот, како и планска документација за населените места и изградба на нови канализациони системи.
„Нашата цел е преку континуирани инвестиции да создадеме подобра инфраструктура, поквалитетни услови за живот и нови можности за развој на Крушево“, истакна градоначалникот Нико Чонески.
