Земјите членки на БРИКС едногласно усвоија заедничка декларација во која изразуваат „длабока загриженост“ поради ескалацијата на војната на Блискиот Исток и повикуваат на максимална воздржаност.
Декларацијата беше усвоена на првиот ден од самитот на лидерите на БРИКС во Њу Делхи, во период кога САД и Иран повторно разменуваат напади по затишјето во поголемиот дел од август. Членките повикаа да се избегнуваат сите потези кои би можеле дополнително да ја влошат ситуацијата и да предизвикаат нова ескалација.
Во документот се нагласува определбата меѓународните спорови да се решаваат по мирен пат, преку дијалог, консултации и дипломатија. БРИКС се заложи и за мултилатерален пристап во решавањето на кризите, со почитување на националните позиции на земјите членки.
Постигнувањето консензус се сметаше за особено сложено бидејќи во БРИКС членува Иран, но и Обединетите Арапски Емирати, кои имаат блиски односи со Вашингтон.
Членките изразија загриженост и поради зголемувањето на едностраните царински и нецарински мерки кои, според нив, ја нарушуваат меѓународната трговија.
Овој дел од декларацијата доаѓа во услови на американски санкции против Техеран поради конфликтот со САД и против Москва поради војната во Украина. БРИКС денес ги обединува Бразил, Русија, Индија, Кина, Јужноафриканската Република, Египет, Етиопија, Индонезија, Иран и Обединетите Арапски Емирати.
Со декларацијата од Њу Делхи, земјите членки се обидуваат да демонстрираат заедничка позиција за дипломатско решавање на меѓународните конфликти и покрај различните надворешнополитички интереси во рамките на блокот.
