Православните верници денес го одбележуваат еден од најголемите зимски христијански празници – Богојавление, меѓу народот познат како Водици. Празникот носи силна духовна порака и е нераскинливо поврзан со осветувањето на водите и со чинот на положување на светиот крст.
Според христијанското предание, на овој ден Свети Јован Крстител го крстил Исус Христос во реката Јордан. Богојавление се празнува уште од вториот век и зазема особено место во православната вера, кога црквата го извршува големиот водосвет.
И оваа година продолжува вековната традиција на положување на крстот во осветените води. Во реките и езерата симболично се фрла светиот крст, а верувањето вели дека оној што ќе го извади ќе има Божја благодат, здравје, среќа и напредок во текот на целата година. Овој чин се смета и за симболично духовно соединување на човекот со Христа.
Богојавление – Водици се празнува во сите епархии на МПЦ–ОА, како и во православните цркви ширум светот кои го следат Јулијанскиот календар. Според народната традиција, по осветувањето водите добиваат лековита и благословена сила.
