Војната со Иран би можела да продолжи до крајот на претседателскиот мандат на Доналд Трамп, па дури и до инаугурацијата на нов американски претседател во јануари 2029 година, објави „Волстрит журнал“. Според весникот, вакво предупредување приватно му пренеле високи претставници на администрацијата, меѓу кои потпретседателот Џеј Ди Венс и државниот секретар Марко Рубио.
Нивната проценка е дека Техеран би можел уште долго да се спротивставува на американскиот притисок, поради што конфликтот може значително да се одолжи.
Овие проценки се разликуваат од јавните изјави на Трамп, кој во средата рече дека очекува војната да заврши веднаш по американските конгресни избори во ноември. Трамп тврди дека Иран повеќе не може долго да го издржи американскиот економски притисок и дека очајнички се обидува да влијае врз изборите во САД.
Американскиот претседател изјави дека дипломатските преговори и натаму се можни, но нагласи дека во моментов Вашингтон не се стреми кон таква опција.
Белата куќа засега не ги коментирала наводите на „Волстрит журнал“ за предупредувања што наводно му биле пренесени на Трамп.
