Вториот пензиски столб нема да биде укинат, а придонесот од шест проценти кој се издвојува за приватните пензиски фондови ќе продолжи да се применува, уверува министерот за социјална политика, демографија и млади, Ѓоко Велковски.
Велковски појасни дека со предложените измени на Законот за пензиското и инвалидското осигурување не се предвидува укинување на задолжителното пензиско штедење, туку само префрлање на законската одредба за висината на придонесот во друг закон.
Со членот 17 од предлог-законот се предлага бришење на постојниот член 120, со кој е регулирана стапката на придонесот за вториот пензиски столб. Според министерот, станува збор за техничко и законско усогласување на регулативата.
„Станува збор за пренесување на законската одредба во друг закон, а не за укинување на пензискиот столб“, посочи Велковски.
Предвидено е стапката од шест проценти да биде регулирана со нов член 25-а во Законот за придонеси од задолжително социјално осигурување. Предлог-измените треба да бидат објавени на Електронскиот национален регистар на прописи (ЕНЕР).
За осигурениците кои се членови на вториот пензиски столб, најавеното решение значи дека ќе продолжи издвојувањето средства на нивните индивидуални пензиски сметки.
Според важечките правила, вкупниот придонес за пензиско и инвалидско осигурување изнесува 19,9 проценти од основицата за пресметка, при што шест процентни поени се насочуваат кон вториот пензиски столб, а останатите 13,9 проценти кон државниот пензиски фонд.
Средствата од вториот столб се управуваат преку приватни пензиски фондови и претставуваат дел од идните пензиски примања на членовите.
Од Министерството нагласуваат дека станува збор за предлог-законски измени, а конечната содржина ќе биде позната по нивното официјално објавување и усвојување.
