Граѓаните се соочуваат со сè поголем притисок врз домашните буџети и наместо нормално функционирање, водат секојдневна борба за покривање на основните трошоци, оцени СДСМ.
На денешната прес-конференција, членката на Извршниот одбор на партијата, Наташа Поповиќ, изјави дека минималната синдикална кошничка достигнала 71.000 денари, а со вклучен трошок за кирија месечните потреби се приближуваат до 90.000 денари.
Според неа, за едно семејство само за храна и пијалаци се потребни околу 26.000 денари месечно, без пресметани дополнителни трошоци како сметки, облека, превоз и потреби за децата.
„Откако Мицкоски и ВМРО се на власт, минималната синдикална кошничка е зголемена за над 10.600 денари за само две години“, изјави Поповиќ.
Од СДСМ предупредуваат и на најавените зголемувања на цените на енергенсите, посочувајќи дека повисоките сметки за електрична енергија и парно дополнително ќе влијаат врз животниот стандард на граѓаните.
Опозициската партија тврди дека околу 180.000 работници во државата примаат плата пониска од 31.200 денари месечно, што според нив претставува сериозен удар врз животниот стандард.
Од СДСМ повторија дека нивно барање е минималната плата да се зголеми на 600 евра, додавајќи дека таков предлог доставиле и преку амандман за Буџетот за 2027 година.
„Нема пари“ е одговорот што, според партијата, најчесто го добиваат од власта, додека истовремено, како што велат, државата продолжува со задолжувања.
На прес-конференцијата Поповиќ се осврна и на состојбата со „Алта банка“, упатувајќи критики кон власта и обвинувајќи ја за лошо управување и коруптивни политики.
Од СДСМ порачаа дека економските политики на Владата, според нив, довеле до осиромашување на граѓаните и дека за тоа власта ќе мора да одговара пред јавноста.
