Министерот за внатрешни работи Панче Тошковски изјави дека со воведувањето на системот „One Stop Shop“ на граничниот премин Ќафасан се заокружува процесот на воспоставување заеднички гранични контроли со соседните држави кои не се дел од Шенген-зоната.
Тој посочи дека Македонија со овој чекор го продолжува моделот што веќе се применува со Србија и Косово, со цел побрзо и поефикасно преминување на границите.
„Со воведувањето на системот со Република Албанија го заокружуваме она што го започнавме со Србија и Косово – воспоставување современ модел на заеднички гранични контроли“, изјави Тошковски.
Министерот нагласи дека досегашното искуство покажало конкретни придобивки за граѓаните, посочувајќи го примерот со граничниот премин Табановце, каде што системот е во функција од јули 2025 година.
Според него, на Табановце во одредени периоди времето на чекање е намалено од неколку часа на околу 30 минути, и покрај тоа што бројот на патници се зголемил за 15 до 20 проценти.
Тошковски оцени дека воведувањето на заедничките гранични контроли придонесува за побрз проток на патници и возила, поголема ефикасност на граничните служби и подобра регионална соработка.
