Пратеничката група на Левица поднесе амандман на Предлог-буџетот за 2027 година со кој бара дополнителни 60 милиони денари за урбанистичко уредување, справување со дивоградбите и заштита на Охридскиот Регион, кој е под заштита на УНЕСКО како светско природно и културно наследство.
Од партијата соопштија дека средствата се наменети за изработка и ревизија на Генералните урбанистички планови за Охрид и Струга, попис и стручна процена на бесправно изградените објекти, финансиска поддршка за отстранување на дивоградбите што ги загрозуваат вредностите на охридското крајбрежје, како и за подготовка на плански документ за негова заштита и уредување.
Од Левица оценуваат дека со години изостануваат системски мерки за справување со бесправната градба и урбанистичките проблеми во регионот, што, според нив, доведува до континуирано нарушување на природното и културното наследство.
Во соопштението наведуваат дека институциите не преземаат доволно ефикасни активности за спроведување на законите и за заштита на Охридскиот Регион, и покрај долгогодишните предупредувања за состојбата.
Од партијата потсетуваат дека УНЕСКО и годинава укажал на ограничен напредок во исполнувањето на препораките за заштита на регионот и побарал забрзување на урбанистичкото планирање, систематска процена на бесправно изградените објекти и конкретни мерки за заштита на крајбрежјето.
Левица смета дека е неопходно институциите навремено да преземат конкретни чекори за зачувување на Охридскиот Регион и неговиот статус на светско наследство.
