„Моето дете се бори да заздрави, но наместо мир и сигурност, живее со страв и неизвесност“. Со овие зборови мајката на Сара, девојката која беше тешко повредена во Охрид, се обрати во јавноста и побара целосно расчистување на случајот.
Ирена во својата објава наведува дека нејзината ќерка сè уште се наоѓа на болничко лекување и дека последиците од настанот не се само физички, туку и психолошки.
„Како мајка и родител, чувствувам потреба јавно да се обратам во името на мојата ќерка Сара. Таа, наместо да се грижи за своето здравје и закрепнување, живее во страв и неизвесност за сопствената безбедност“, напиша таа.
Мајката изнесува низа тврдења за случувањата пред и по нападот, посочувајќи дека според неа постоеле обиди случајот да биде прикриен и да се влијае врз неговиот тек.
Таа тврди дека Сара била нападната во возило, дека претходно ѝ бил уништен телефонот и дека во тие моменти била оневозможена да побара помош.
„Собери ги сите познаници, да го прикриеме ова и да се ослободиме од неа“ – се зборови за кои мајката наведува дека Сара ги слушнала додека била во беспомошна состојба.
Ирена во објавата посочува и дека има сознанија за постапки на лица од опкружувањето на осомничениот, за кои смета дека треба да бидат предмет на проверка од надлежните органи.
Особено ја загрижува, како што наведува, фактот дека нејзината ќерка била оставена без навремена помош.
„Најголемата среќа во целата оваа трагедија е што Сара дошла при свест пред да биде однесена на непознато место. Кога сфатил дека се освестила, била оставена на улица“, наведува мајката.
Таа упати апел институциите да постапат независно и професионално, без оглед на тоа кој стои зад лицата поврзани со случајот.
„До кога ќе дозволуваме некој да мисли дека може да прави што сака и да избегнува одговорност затоа што има врски и познанства?“, прашува Ирена.
Од СВР Охрид претходно информираа дека на 15 ноември бил лишен од слобода Х.К. (31) од Охрид, по пријава дека физички ја нападнал својата девојка. Од полицијата посочија дека по целосно документирање на настанот ќе биде поднесена соодветна кривична пријава.
Сите околности за нападот, како и евентуалната вмешаност или одговорност на други лица, треба да бидат утврдени во понатамошната постапка.
