„Ви благодарам на сите што ми пишувате и се грижите за мене. Сакам да нагласам дека никој во Бугарија не ме принудил на ништо. Овде добив помош, грижа и поддршка“, напиша денеска на Фејсбук Ива Михаилова, девојката од Кочани која по тешката сообраќајна несреќа замина во Бугарија.
Михаилова во објавата наведува дека ја чувствува поддршката од бугарскиот народ и дека тоа ѝ дава сила во периодот на лекување.
„Не сакам да бидам дел од политички спорови и нема повеќе да коментирам на оваа тема“, порача таа.
Таа додаде дека нејзиниот главен фокус во моментов е целосното закрепнување.
„Се лекувам и правам сè што е можно за повторно да можам нормално да застанам на нозе. Ве молам, дозволете ми да оздравам во мир“, напиша Михаилова.
Нејзината реакција доаѓа по објавата на бугарскиот јутјубер Станислав Цанов, кој претходно објави делови од тајно снимени разговори во кои Михаилова зборува за наводни притисоци од бугарската Државна агенција за национална безбедност (ДАНС).
Ива Михаилова моментално се наоѓа во Бугарија, додека во Основниот суд во Кочани против неа се води судска постапка во отсуство за сообраќајната несреќа на патот Штип – Кочани, во која загина 33-годишниот Бесим Дурмиши.
