Полициските службеници Мартин Арсовски и Дарко Милошевски, обвинети во предметот за пожарот во дискотеката „Пулс“ во Кочани, биле испратени на подрачјето на ОВР Кочани без да бидат информирани за конкретните задачи што ќе ги извршуваат, сведочеше денеска Драган Василески, виш инспектор за економски криминалитет во ОВР Пробиштип.
Пред судот, Василески изјави дека на 14 март 2026 година добил наредба од тогашниот началник на ОВР Пробиштип да предложи двајца инспектори кои следната вечер ќе бидат упатени на службени активности во Кочани.
Тој посочи дека ниту тој, ниту Арсовски и Милошевски немале информации за целта на ангажманот, туку им било кажано само во определено време да се јават на бензинска пумпа во Кочани, каде што ќе бидат пречекани од колеги од ОВР Кочани.
„Ниту јас ниту колегите Дарко и Мартин не знаевме кои конкретни активности ќе ги извршуваат во Кочани. Беше кажано само дека со службено возило ќе се јават на бензинска пумпа, каде што ќе бидат пречекани и ќе извршуваат одредени службени задачи“, изјави сведокот.
Василески додаде дека на инспекторите не им било кажано да бидат во униформа, ниту биле запознаени со евентуални ризици или со постоење оперативен план за акциската контрола.
Според неговото сведочење, инспекторите од Пробиштип не учествувале во подготовката, организацијата или изработката на планот за акцијата. Тој истакна и дека до денот на трагедијата немал слушнато за дискотеката „Пулс“, како и дека истото важело и за обвинетите полициски службеници.
Василески пред судот кажа дека, според информациите што ги добил по пожарот, Арсовски и Милошевски првично биле распоредени на други локации во Кочани и околината, а подоцна добиле задача да учествуваат во контрола во дискотеката.
Тој појасни дека околу 2:30 часот по полноќ двајцата инспектори, заедно со полициски службеници од ОВР Кочани, влегле во објектот со задача да извршат проверка на лице за кое постоело сомнение дека поседува наркотични средства.
По излегувањето од просторот кај тоалетите, каде што била извршена проверката, тие забележале дека гостите почнуваат да го напуштаат објектот и дека се создава метеж.
Во паузата од судењето, во име на родителите на загинатите во трагедијата се обрати Александар Наунов, кој посочи дека секое рочиште за семејствата значи повторно соочување со болката од загубата.
„Додека ние ги преживуваме најстрашните моменти од нашите животи, во судницата слушаме паушални одговори, оправдувања, префрлање вина и усни наредби“, рече Наунов, прашувајќи дали е професионално да се спроведува акција без соодветна информираност и координација меѓу службите.
Тој постави прашање и дали подобра организација, навремена координација и обезбедување коридор за евакуација можеле да спречат дел од трагичните последици.
Судењето се однесува на пожарот што избувна на 16 март 2025 година во дискотеката „Пулс“ во Кочани, во кој загинаа 63 лица, а повеќемина беа повредени. Во предметот се обвинети 13 полициски службеници, за кои Обвинителството тврди дека не постапиле согласно обврските и акцискиот план поврзан со контролата на објектот.
