Поранешниот австриски канцелар Себастијан Курц смета дека светот во следната деценија значително ќе се промени, посочувајќи дека актуелните случувања во Франција и Германија се показател за големите политички и општествени предизвици со кои се соочува Европа.
Говорејќи на панел-дискусијата „C3 Business Talk“, Курц оцени дека протестите во Франција се последица на погрешни миграциски политики, при што, според него, голем број млади луѓе остануваат без јасна перспектива, а економскиот стандард што го имале претходните генерации станува сè потешко одржлив.
Тој изрази загриженост и за политичката состојба во Германија, оценувајќи дека земјата се наоѓа во сложен период во кој политичките партии од крајните позиции добиваат сè поголема поддршка, додека традиционалните партии од центарот ја губат својата сила.
„За десет години ќе живееме во сосема поинаков свет“, изјави Курц.
Осврнувајќи се на политичките случувања во Соединетите Американски Држави, Курц прогнозираше дека актуелниот државен секретар Марко Рубио ќе биде претседателски кандидат на Републиканската партија на изборите во 2028 година, додека Џеј Ди Венс, според неговата проценка, би можел да биде кандидат за потпретседател.
На прашањето дали размислува за враќање во политиката, Курц одговори дека иако секогаш уживал во политичката работа, во моментов нема намера повторно да се активира на политичката сцена.
Себастијан Курц беше канцелар на Австрија во два мандата – од декември 2017 до мај 2019 година и од јануари 2020 до октомври 2021 година. Тој поднесе оставка поради обвинувања за корупција, по што целосно се повлече од политиката. Во своето време беше најмладиот канцелар во историјата на Австрија.
