Поради одбележувањето на верскиот празник Задушница, денеска во Скопје е воведен посебен режим на сообраќај на улиците што водат кон градските гробишта, информира Министерството за внатрешни работи.
Кај градските гробишта Бутел сообраќајот се одвива по еднонасочен кружен режим. Возилата се движат по улицата „Бутелска“, потоа лево по „Александар Урдаревски“, повторно лево по „Боца Иванова“ и десно до влезот на гробиштата.
За излез од гробиштата, возачите се упатуваат десно по „Боца Иванова“ до кружниот тек со „Бутелска“, потоа лево по „Бутелска“ и десно по улицата „Кемал Сејфула“.
Посебен режим на сообраќај е воведен и во близина на гробиштата Камник, Драчево и Ѓорче Петров, каде се очекува зголемена фреквенција на возила и посетители.
Од МВР апелираат до граѓаните да ја почитуваат поставената сообраќајна сигнализација, како и насоките и наредбите што ќе ги даваат полициските службеници на терен.
