Со усвојувањето на ребалансот на буџетот на Град Скопје се обезбедени средства за изградба на две нови средни училишта во главниот град – „Кочо Рацин“ во општина Ѓорче Петров и „Браќа Миладиновци“ во Драчево, општина Кисела Вода, информираше градоначалникот Орце Ѓорѓиевски.
Според најавата, двата објекти ќе бидат изградени со сопствени средства на Град Скопје, со цел да се обезбедат подобри услови за учениците и наставниот кадар.
„Ниту едно дете не треба да ја гради својата иднина во услови што му го одземаат достоинството. Нашите ученици заслужуваат училишта во кои ќе влегуваат со радост, ќе учат со мотивација и ќе ги развиваат своите способности“, изјави Ѓорѓиевски.
Градоначалникот посочи дека реализацијата на овие капитални проекти е резултат на намалувањето на непродуктивните расходи и подобрената наплата на приходите во градската каса.
Тој информираше дека до 30 септември 2026 година Град Скопје реализирал капитални инвестиции во вредност од 1,1 милијарда денари, што, според него, претставува повисока реализација во споредба со исти периоди од првите години од мандатите на претходни градоначалници.
„За само една година ги намаливме непродуктивните расходи и работевме на подобра наплата на приходите. Резултатот е конкретен – рекордни капитални инвестиции од 1,1 милијарда денари“, наведе Ѓорѓиевски.
Тој им се заблагодари на советниците кои учествуваа во донесувањето на ребалансот, оценувајќи дека со него се создава простор за нови инфраструктурни проекти и дополнителна поддршка за граѓаните.
