Поранешниот директор на Државна лотарија, Перпарим Бајрами, кој е првообвинет во случајот „Лотарија“, ќе излезе од притвор откако Основниот кривичен суд Скопје ја прифатил понудената гаранција од 1.140.781 евра во недвижен имот.
Од Судот информираат дека Кривичниот совет постапувал по предлог на одбраната за замена на мерката притвор со гаранција, при што предлогот бил усвоен, а притворот укинат.
Бајрами во предметот „Лотарија“ е обвинет за кривично дело „Злоупотреба на службената положба и овластување“, за кое е предвидена затворска казна до пет години.
Против него, Основното јавно обвинителство Скопје поднело обвинителен предлог на 13 август 2026 година. Притворот му бил определен откако бил пронајден и лишен од слобода, бидејќи претходно не бил достапен за органите на прогонот.
Согласно Законот за кривичната постапка, притворот во овој случај не можел да трае подолго од 60 дена. Бајрами на 9 септември 2026 година самиот се јавил на издржување на мерката во КПУ Затвор Скопје, по што законскиот рок за притвор истекува на 8 ноември.
Судот ја прифатил гаранцијата како обезбедување за неговото присуство во текот на постапката, но истовремено му определил и дополнителни мерки за претпазливост.
На Бајрами му е одземена патната исправа, му е забрането издавање нова исправа за преминување на државната граница, а има и обврска редовно да се јавува во Судот.
