Претседателката Гордана Сиљановска-Давкова упати честитка до новоизбраната претседателка на Бугарија, Илијана Јотова, и до потпретседателот Кирил Валчев, по нивната победа на претседателските избори, изразувајќи надеж за унапредување на односите меѓу двете соседни земји.
Во објава на социјалната мрежа Икс, Сиљановска-Давкова, во свое име и во име на македонските граѓани, им посака успешен мандат, оценувајќи дека изборниот резултат ја одразува довербата што им ја дале бугарските граѓани.
Таа истакна дека очекува Бугарија под водство на Јотова да има конструктивна улога во регионот и во Европа, како и да придонесе за зајакнување на регионалната соработка.
Македонската претседателка нагласи дека останува посветена на развојот на добрососедските односи и на градењето партнерство засновано врз меѓусебно почитување, отворен дијалог и разбирање.
Во пораката таа оцени дека со политичка волја и заемна посветеност е можно да се надминат постојните предизвици и да се создадат подобри услови за соработка, во интерес на мирот, стабилноста и просперитетот на двете држави и регионот.
