Македонската делегација отпатува за Дакар, Сенегал, каде до 13 ноември 2026 година ќе се одржуваат Младинските олимписки игри. На овој значаен меѓународен спортски настан Македонија ќе настапи со тројца млади спортисти кои во изминатиот период минаа низ сериозни подготовки и квалификациски циклуси.
Делегацијата ја предводи шефицата Елена Зисовска Апостолска, а македонските бои во Дакар ќе ги бранат:
Марио Брезовски во триатлон, во дисциплината спринт триатлон;
Ева Митевска во атлетика, на 100 метри;
Петар Цеков во пливање, на 400 и 800 метри.
За младите спортисти ова ќе биде прво олимписко искуство и важен чекор во нивниот понатамошен развој. Зад настапот во Сенегал стојат години посветена работа, секојдневни тренинзи и голема дисциплина, а учеството на Игрите претставува можност за стекнување драгоцено меѓународно искуство.
Младинските олимписки игри во Дакар имаат историско значење бидејќи за првпат во историјата еден олимписки настан се одржува на африканскиот континент.
На овогодишното издание се очекува учество на околу 2.700 млади спортисти од повеќе од 200 национални олимписки комитети од целиот свет.
