Откако Народната банка на Србија ја одзеде дозволата за работа на Алта банка и објави дека банката влегува во стечај, од опозицискиот СДСМ побараа истрага за работењето на банката и за нејзината поврзаност со институции и компании од Македонија.
Од партијата тврдат дека со одлуката биле блокирани сметките на граѓани и компании, а посочуваат дека и дел од државните компании имале депозити во банката.
„Сите што работеа со државата имаа налог да работат со Алта“, наведуваат од СДСМ, според кои со месеци наназад укажувале на, како што велат, сомнежи поврзани со банката.
Од опозициската партија обвинија дека институциите не реагирале навреме и побараа Обвинителството да преземе активности и да ги испита сите околности поврзани со случајот.
„Со месеци бараме истрага, реакција од Обвинителство, Народна банка и Финансиска полиција. Молчеа и не преземаа ништо“, се наведува во соопштението на СДСМ.
Од партијата побараа утврдување на евентуална одговорност кај сите лица и институции кои биле вклучени во процесите поврзани со Алта банка, тврдејќи дека мора да се утврди дали е предизвикана штета за граѓаните и државата.
Обвинувањата на СДСМ доаѓаат по одлуката на Народната банка на Србија за отворање стечајна постапка над Алта банка, по што ќе следуваат понатамошни чекори во рамки на законската процедура.
