Студентската изборна листа „Студентите победуваат“ освои убедлива победа на предвремените парламентарни избори во Србија и, според конечните проекции на Центарот за слободни избори и демократија (ЦеСИД) и агенцијата Ипсос, ќе формира стабилно парламентарно мнозинство, ставајќи крај на 14-годишното владеење на Српската напредна партија (СНС).
Според обработени 96 проценти од примерокот, студентската листа освоила 52,9 проценти од гласовите, што се претвора во 140 пратенички мандати во 250-членото Народно собрание. Листата „Александар Вучиќ – Обединета Србија“ освоила 38,8 проценти од гласовите, односно 103 мандати.
Под изборниот праг остана листата „Ивица Дачиќ – Фактор на стабилност“ со 2,2 проценти од гласовите, додека останатите политички опции освоија помалку од еден процент. Во новиот парламентарен состав ќе бидат застапени и неколку малцински листи – Сојузот на војводинските Унгарци (СВМ) со три мандати, Албанската коалиција со два, како и СДА Санџак – Чувари на Санџак и листата на Расим Љајиќ со по еден пратеник.
Со овие резултати, Александар Вучиќ го претрпе најголемиот политички пораз откако е на власт, губејќи од движење кое пред само две години не постоеше. Студентската листа произлезе од масовните протести што започнаа по трагедијата во Нови Сад, кога при уривањето на настрешницата на железничката станица загинаа 16 лица.
За разлика од традиционалните партии, студентското движење нема еден доминантен лидер. На изборната листа се најдоа лекари, универзитетски професори, економисти, правници, спортисти, актери и граѓански активисти, од кои повеќето досега немале високи државни функции. Меѓу попознатите кандидати се кошаркарската легенда Дејан Бодирога, поранешниот гувернер Дејан Шошкиќ, актерот Тихомир Станиќ и социологот Јово Бакиќ.
Носител на листата е новосадскиот кардиолог и професор на Медицинскиот факултет, Илија Срдановиќ, но тоа не значи дека тој автоматски ќе биде нов премиер. Од движењето сè уште не соопштиле кој ќе биде мандатар за состав на новата влада.
Студентската листа формално беше основана во септември од група универзитетски професори и јавни личности, а за учество на изборите обезбеди повеќе од 70.000 потписи. Нејзината програма е заснована на три главни столба – борба против корупцијата, зајакнување на независноста на институциите и реформи во образованието и социјалната политика.
Меѓу клучните ветувања се формирање посебна полициска служба во рамките на обвинителството, проверка на потеклото на имотот на функционерите, лустрација за носителите на јавни функции кои го прекршиле законот, како и бесплатни учебници, поевтини лекови и поголеми инвестиции во образованието. Реализацијата на овие мерки ќе зависи од формирањето на новата влада и од парламентарните процедури.
